ساؤتھ ایشین گیمز کے شیڈول اور میزبانی کی باضابطہ منظوری

اسلام آباد میں صدر پاکستان اولمپک ایسوسی ایشن عارف سعید کی زیرِ صدارت ساؤتھ ایشیا اولمپک کونسل کی ایگزیکٹو کمیٹی کے اجلاس میں پاکستان میں 14ویں ساؤتھ ایشین گیمز کے باضابطہ شیڈول کی منظوری دے دی گئی ہے۔ اجلاس میں سری لنکا، بنگلہ دیش، نیپال، بھوٹان اور مالدیپ کے وفود نے بالمشافہ جبکہ بھارتی وفد نے ویڈیو لنک کے ذریعے شرکت کی۔ منظور شدہ شیڈول کے تحت یہ میگا ایونٹ اگلے برس 3 سے 11 اپریل تک اسلام آباد، لاہور اور پشاور میں منعقد ہوگا، جس میں 4,200 سے زائد ایتھلیٹس اور آفیشلز حصہ لیں گے۔ ایونٹ میں مردوں کے 28 اور خواتین کے 25 کھیلوں میں مجموعی طور پر 346 گولڈ میڈلز کے مقابلے ہوں گے۔ صدر پی او اے کے مطابق حکومتِ پاکستان اس ایونٹ کے لیے بھرپور تعاون کر رہی ہے اور وزیراعظم شہباز شریف گیمز کے لیے فنڈز کی منظوری پہلے ہی دے چکے ہیں۔