اسلام آباد میں نومولود بچوں کی ہلاکت انسانی تاریخ کا بدترین سانحہ ہے: بلاول بھٹو

اسلام آباد: چیئرمین پاکستان پیپلز پارٹی (پی پی پی) بلاول بھٹو زرداری نے وفاقی دارالحکومت کے پمز ہسپتال میں 14 نومولود بچوں کی ہلاکت کو انسانی تاریخ کا بدترین سانحہ قرار دیتے ہوئے شدید افسوس اور تشویش کا اظہار کیا ہے۔

سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے بیان میں بلاول بھٹو زرداری نے کہا کہ مائیں اپنے بچوں کو 9 ماہ اس لیے اپنی کوکھ میں نہیں پالتی ہیں کہ کسی انتظامی غفلت کے نتیجے میں وہ دنیا میں آتے ہی زندہ جل جائیں۔ انہوں نے کہا کہ ان معصوم بچوں کے دنیا میں آتے ہی ان کی زندگی اور امیدوں کے چراغ گل کر دیے گئے۔

پی پی پی چیئرمین نے کہا کہ اپنے لختِ جگر کو کھونے والے بے بس باپ اور غمزدہ خاندان آج انصاف کا تقاضا کر رہے ہیں۔ انہوں نے مطالبہ کیا کہ اس دلخراش واقعے کی شفاف تحقیقات کے ذریعے فوری طور پر ذمہ داری کا تعین کیا جائے اور متاثرہ خاندانوں کو ہر صورت انصاف فراہم کیا جائے۔