پمز واقعہ کے ذمہ داروں کیخلاف کارروائی ہو گی، خود کو احتساب کیلئے پیش کرتا ہوں: مصطفیٰ کمال

اسلام آباد: وفاقی وزیرِ صحت مصطفیٰ کمال نے پمز ہسپتال (PIMS) پہنچ کر آتشزدگی کے دلخراش واقعے کے بعد کی صورتحال کا جائزہ لیا اور جاں بحق بچوں کے لواحقین سے ملاقات کر کے تعزیت کا اظہار کیا۔

میڈیا سے گفتگو کرتے ہوئے مصطفیٰ کمال نے تصدیق کی کہ واقعے میں 14 بچے شہید ہوئے ہیں۔ انہوں نے سب سے پہلے خود کو احتساب کے لیے پیش کرتے ہوئے کہا کہ اگر ان کی اپنی بھی غلطی ثابت ہوئی تو رعایت نہیں کی جائے گی۔ ان کا کہنا تھا کہ حادثہ صبح 6 بج کر 38 منٹ پر پیش آیا، جہاں ابتدائی شواہد کے مطابق اے سی سے شعلہ نکلا اور آگ وارڈ میں موجود آکسیجن لائنوں کی وجہ سے تیزی سے پھیل گئی۔

استعفے سے متعلق سوال کے جواب میں وفاقی وزیر نے کہا کہ وزیراعظم ان کے باس ہیں اور کسی کو عہدے سے ہٹانے یا معطل کرنے کا تمام تر اختیار وزیراعظم شہباز شریف کا ہے۔ انہوں نے بتایا کہ واقعے کی مکمل تحقیقاتی رپورٹ 2 سے 3 دن کے اندر سامنے آ جائے گی جسے عوام اور میڈیا کے سامنے پیش کیا جائے گا۔

وفاقی وزیر کی میڈیا ٹاک کے دوران جاں بحق بچوں کے شدید غم و غصے میں مبتلا لواحقین نے ہسپتال انتظامیہ اور حکومت کے خلاف زبردست احتجاج اور نعرے بازی کی اور واقعے کی سخت الفاظ میں مذمت کی۔