ایتھوپیا کے یومیف کیجیلچا نے ہاف میراتھن کا عالمی ریکارڈ دوبارہ اپنے نام کرلیا

ایتھوپیا کے نامور ایتھلیٹ یومیف کیجیلچا نے بوئنس آئرس میں منعقدہ ہاف میراتھن ریس میں شاندار کارکردگی کا مظاہرہ کرتے ہوئے 56 منٹ اور 51 سیکنڈز کے ریکارڈ وقت کے ساتھ فتح حاصل کی اور عالمی ریکارڈ دوبارہ اپنے نام کر لیا ہے۔ 29 سالہ ایتھلیٹ نے اس سے قبل 2024 میں ویلنسیا ہاف میراتھن 57 منٹ اور 30 سیکنڈز میں جیت کر عالمی ریکارڈ قائم کیا تھا، جسے رواں سال مارچ میں یوگینڈا کے جیکب کپلیمو نے توڑ دیا تھا۔ تاہم یومیف کیجیلچا نے شاندار واپسی کرتے ہوئے یہ اعزاز دوبارہ حاصل کر لیا ہے۔ دوسری جانب خواتین کے ایونٹ میں بھی ایتھوپیا کی فوٹین ٹیسفے نے کامیابی حاصل کی، انہوں نے مقررہ فاصلہ ایک گھنٹے 3 منٹ اور 57 سیکنڈز میں طے کر کے ریس اپنے نام کی۔