پمز ہسپتال آتشزدگی سانحہ: این آئی سی یو میں نیبولائزر پھٹنے سے آگ لگی، ابتدائی رپورٹ

اسلام آباد: پمز ہسپتال (PIMS) کے این آئی سی یو (NICU) میں پیش آنے والے دلخراش آتشزدگی کے واقعے کی ابتدائی رپورٹ انتظامیہ نے تیار کر لی ہے، جس میں حادثے کی بنیادی وجوہات اور بچوں کی اموات کا سبب سامنے آ گیا ہے۔

پمز انتظامیہ کی جانب سے تیار کردہ ابتدائی رپورٹ کے مطابق سانحہ انکیوبیٹر کے ساتھ آکسیجن کی مقدار بتانے والے نیبولائزر کے اچانک پھٹنے سے پیش آیا۔ نیبولائزر کے پھٹتے ہی وہاں موجود آکسیجن کی مقدار نے فوری طور پر آگ پکڑ لی، جو شروع میں کم تھی لیکن آکسیجن کی موجودگی کے باعث نہایت تیزی سے پھیل گئی۔

رپورٹ میں انکشاف کیا گیا ہے کہ آگ لگنے سے شدید دھواں پیدا ہوا جو آکسیجن اور وینٹی لیٹر پائپوں کے ذریعے معصوم بچوں کے سانس کے نظام میں داخل ہو گیا۔

ابتدائی تحقیقاتی رپورٹ میں بتایا گیا ہے کہ این آئی سی یو میں موجود معصوم بچوں کی اموات آکسیجن کی فراہمی منقطع ہونے، دم گھٹنے اور جسمانی طور پر جھلسنے کی وجہ سے ہوئیں۔ انتظامیہ کے مطابق واقعے کی تمام تفصیلات اعلیٰ حکام کو بھیج دی گئی ہیں تاکہ حتمی ذمہ داری کا تعین کیا جا سکے۔