علامہ اقبال انٹرنیشنل ایئرپورٹ پر نئے امیگریشن کاؤنٹرز فعال

لاہور: علامہ اقبال انٹرنیشنل ایئرپورٹ پر مسافروں کی سہولت اور امیگریشن کے عمل کو تیز تر بنانے کے لیے نیا امیگریشن ایریا اور نئے کاؤنٹرز مکمل طور پر فعال کر دیے گئے ہیں۔

وفاقی وزیر داخلہ سید محسن نقوی نے ایئرپورٹ مینیجر اور ڈپٹی ایئرپورٹ مینیجر کے ہمراہ نئے امیگریشن ایریا کا باقاعدہ افتتاح کیا۔ افتتاح کے بعد وزیر داخلہ نے پورے ایریا کا تفصیلی دورہ کیا، کاؤنٹرز کے انتظامات اور مسافروں کی پروسیسنگ کے نظام کا جائزہ لیا۔

محسن نقوی نے پاکستان ایئرپورٹس اتھارٹی (PAA) اور لاہور ایئرپورٹ انتظامیہ کی کاوشوں کو سراہتے ہوئے امیگریشن ایریا کے اعلیٰ معیار پر اطمینان کا اظہار کیا۔ انہوں نے ہدایت کی کہ مسافروں کو ہر ممکن سہولت فراہم کی جائے تاکہ انہیں قطاروں میں طویل انتظار نہ کرنا پڑے۔

ایئرپورٹ انتظامیہ اور پاکستان ایئرپورٹس اتھارٹی کے مطابق نئے کاؤنٹرز کے قیام سے فلائٹس کی آمد و رفت کے وقت مسافروں کی پروسیسنگ کی استعداد میں نمایاں اضافہ ہوگا اور بڑھتے ہوئے مسافر ٹریفک کو منظم کرنے میں مدد ملے گی۔