پانی میں موجود نمک خاموشی سے کروڑوں افراد کو ہائی بلڈ پریشر کا مریض بنانے لگا

ایک حالیہ تحقیق سے یہ بات سامنے آئی ہے کہ پینے کے پانی میں موجود سوڈیم یا نمک ہائی بلڈ پریشر کے خطرے میں اضافہ کر سکتا ہے۔ فلوریڈا سٹیٹ یونیورسٹی کی تحقیق کے مطابق پینے کے پانی میں زیادہ مقدار میں نمک اور ہائی بلڈ پریشر کے درمیان تعلق موجود ہے، خاص طور پر وہ افراد جو ساحلی علاقوں میں رہتے ہیں۔

محققین نے بتایا کہ مقصد لوگوں کو خوفزدہ کرنا نہیں بلکہ ایک ماحولیاتی عنصر کی نشاندہی کرنا ہے جو متعدد افراد میں ہائی بلڈ پریشر کی وجہ بن رہا ہے۔ امریکہ میں بیشتر افراد اپنے جسم میں پہلے ہی ضرورت سے زیادہ مقدار میں نمک لیتے ہیں، اور پانی میں موجود اضافی سوڈیم اس مقدار کو مزید بڑھا دیتا ہے۔

اس تحقیق میں امریکہ، بنگلادیش، ویتنام، کینیا، آسٹریلیا اور دیگر یورپی ممالک سے تعلق رکھنے والے 74 ہزار افراد کے ڈیٹا کا تجزیہ کیا گیا۔ نتائج کے مطابق جو افراد زیادہ نمک والے پانی کا استعمال کرتے ہیں، ان کا بلڈ پریشر دیگر افراد کے مقابلے میں کچھ زیادہ ہوتا ہے۔

تحقیق کے مطابق نمکین یا کھارے پانی کے استعمال سے ہائی بلڈ پریشر کا خطرہ 26 فیصد تک بڑھ جاتا ہے، اور یہ تعلق ساحلی علاقوں میں زیادہ نمایاں ہوتا ہے۔ اگرچہ بظاہر یہ خطرہ زیادہ محسوس نہیں ہوتا، لیکن معمولی بلڈ پریشر میں اضافہ بھی صحت پر منفی اثر ڈال سکتا ہے۔

دنیا بھر میں تین ارب سے زائد افراد ساحلی علاقوں یا ان کے قریب رہتے ہیں، جہاں زیر زمین پانی پینے کا بنیادی ذریعہ ہے، اور ایسے اکثر پانی میں نمک کی مقدار زیادہ ہوتی ہے۔