سوشل میڈیا کے منفی اثرات: مختلف ممالک میں کم عمر بچوں کے استعمال پر پابندیاں

کم عمر بچوں کی اخلاقی تربیت، ذہنی اور جسمانی صحت پر سوشل میڈیا کے بڑھتے ہوئے منفی اثرات کے پیشِ نظر دنیا بھر میں آن لائن پلیٹ فارمز کے حوالے سے قوانین کو سخت کرنے کا رجحان تیز ہو گیا ہے۔ عالمی خبر رساں اداروں کے مطابق، آسٹریلیا اور انڈونیشیا نے 16 سال سے کم عمر بچوں کے سوشل میڈیا استعمال پر مکمل پابندی عائد کر دی ہے، جب کہ آسٹریلیا میں قانون کی خلاف ورزی کرنے والے پلیٹ فارمز کو 49.5 ملین ڈالر تک کے بھاری جرمانے کا سامنا کرنا پڑ سکتا ہے۔ اسی طرح، ترکیہ نے 15 سال سے کم عمر افراد کے لیے سوشل میڈیا پر پابندی لگاتے ہوئے سخت تصدیقِ عمر کو لازمی قرار دیا ہے، جب کہ برازیل نے 16 سال سے کم عمر نوجوانوں کے اکاؤنٹس کو قانونی سرپرستوں سے منسلک کرنا لازمی کر دیا ہے۔ چین نے بھی ‘مائنر موڈ’ پروگرام کے تحت ڈیوائس اور ایپس کی سطح پر مخصوص پابندیاں نافذ کی ہیں۔ ماہرین نے ان عالمی اقدامات کو بچوں کے محفوظ مستقبل کے لیے خوش آئند قرار دیتے ہوئے زور دیا ہے کہ پاکستان میں بھی بچوں کو آن لائن خطرات سے بچانے کے لیے عالمی طرز پر فوری قانون سازی کی جائے۔