اسرائیل اسلام آباد مفاہمتی یادداشت کو سبوتاژ کر رہا ہے: عباس عراقچی

تہران میں ایک اہم تقریب سے خطاب کرتے ہوئے ایرانی وزیر خارجہ سید عباس عراقچی نے الزام عائد کیا ہے کہ اسرائیل اسلام آباد مفاہمتی یادداشت کو ناکام بنانے کے لیے مسلسل متحرک ہے۔ انہوں نے کہا کہ امریکہ کا ایران سے غیر مشروط سرنڈر کروانے کا خواب کبھی پورا نہیں ہوا اور ایرانی قوم کی بھرپور مزاحمت کے باعث دشمن اپنے کسی بھی ہدف میں کامیاب نہیں ہو سکا۔ عباس عراقچی نے گفتگو کرتے ہوئے واضح کیا کہ ایران میں حکومت کی تبدیلی (رجیم چینج) اور ملک کو اندرونی طور پر تقسیم کرنے کی تمام تمام کوششیں مکمل طور پر ناکام ہو چکی ہیں۔ انہوں نے بتایا کہ جنگ کے آغاز کے کچھ ہی عرصے بعد دشمن نے خود مذاکرات کی درخواست کی تھی، جس کے بعد ایران نے اپنی طے شدہ شرائط کے تحت جنگ بندی اور مذاکراتی عمل پر آمادگی ظاہر کی۔ ایرانی وزیر خارجہ کا کہنا تھا کہ ایران نے سفارتی میز پر بھی اپنی طاقت اور مکمل اعتماد کا مظاہرہ کیا۔ طے پانے والے سمجھوتے کی اکثر شقیں ایران کے قومی مفادات کے عین مطابق ہیں اور یہ تاریخی سفارتی کامیابی کسی فرد یا وزارت خارجہ کی نہیں بلکہ پوری ایرانی قوم کی فتح ہے۔ انہوں نے جدید عالمی نظام پر بات کرتے ہوئے کہا کہ آج کے دور میں طاقت ہی کسی ملک کی عزت اور پوزیشن کا مرکز ہے۔ امریکہ اور اسرائیل کے خلاف جاری اس کشمکش میں ایران کی میزائل طاقت نے سب سے اہم اور بنیادی محور کا کردار ادا کیا ہے۔