گوگل کا نیا فیچر، نینو بنانا کی تصاویر اور ویڈیوز سے واٹر مارک ہٹانا ممکن

گوگل نے اپنے مصنوعی ذہانت (اے آئی) ٹولز سے تیار کردہ تصاویر اور ویڈیوز میں سے نمایاں (مرئی) واٹر مارک ہٹانے کے لیے ایک نیا اپشن متعارف کرانے کا اعلان کیا ہے۔ کمپنی کے مطابق نینو بنانا (Nano Banana) امیج جنریٹر سمیت جیمنائی (Gemini)، فلو (Flow) اور جیمنائی اومنی (Gemini Omni) کے ذریعے بنائی گئی تصاویر اور ویڈیوز کے نچلے کونے میں موجود نمایاں واٹر مارک کو اب صارف کی ترجیح کے مطابق ہٹایا جا سکے گا۔ یہی سہولت گوگل سرچ کے ’اے آئی موڈ‘ میں بھی فراہم کی جائے گی۔

گوگل نے واضح کیا ہے کہ یہ فیچر ان ممالک میں دستیاب نہیں ہوگا جہاں مقامی قوانین اے آئی مواد پر واضح واٹر مارک برقرار رکھنا لازمی قرار دیتے ہیں۔ علاوہ ازیں، نئی سیٹنگ کے ذریعے صرف نظر آنے والا واٹر مارک ہٹایا جائے گا، جبکہ مواد کی اصلیت اور شناخت برقرار رکھنے کے لیے ’سنتھ آئی ڈی‘ (SynthID) جیسے نادیدہ ڈیجیٹل واٹر مارکس اور سی ٹو پی اے (C2PA) میٹا ڈیٹا بدستور موجود رہے گا۔

.