وزیراعظم کی عازمینِ حج کو بہترین سہولیات کی فراہمی، مؤثر انتظامات یقینی بنانے کی ہدایت

وزیراعظم محمد شہباز شریف نے آئندہ حج کے دوران پاکستانی عازمین کو اعلیٰ ترین سہولیات کی فراہمی اور تمام تر انتظامی اقدامات بروقت مکمل کرنے کی سخت ہدایت جاری کی ہے۔

یہ ہدایات وفاقی وزیرِ مذہبی امور سردار محمد یوسف کے ساتھ ہونے والی ایک ملاقات کے دوران دی گئیں۔ ملاقات میں وفاقی وزیر نے وزیراعظم کو آئندہ حج کی تیاریوں، انتظامات اور اب تک کی پیش رفت سے تفصیل کے ساتھ آگاہ کیا۔ اس کے علاوہ سردار محمد یوسف نے وزارتِ مذہبی امور کی جانب سے جاری دیگر اقدامات اور امور پر بھی بریفنگ دی۔

وزیراعظم نے بریفنگ پر اطمینان کا اظہار کرتے ہوئے تاکید کی کہ حجاجِ کرام کو رہائش، سفر اور دیگر تمام ضروری شعبوں میں بہترین سہولیات فراہم کی جائیں۔ انہوں نے واضح کیا کہ حج انتظامات میں کسی بھی قسم کی غفلت نہ برتی جائے اور تمام تر عمل مقررہ وقت میں مکمل کیا جائے۔