سپریم کورٹ کا فیصلہ شاندار اور تاریخی، سیاسی بے چینی ختم ہوگی: شیخ رشید

سابق وفاقی وزیر داخلہ اور عوامی مسلم لیگ کے سربراہ شیخ رشید احمد نے بانی پی ٹی آئی عمران خان کی ہسپتال منتقلی سے متعلق سپریم کورٹ کے فیصلے کو شاندار اور تاریخی قرار دیتے ہوئے کہا ہے کہ اس اقدام سے عوام میں پائی جانے والی سیاسی بے چینی اور تشویش کا خاتمہ ہوگا۔

ایک جاری کردہ ویڈیو بیان میں شیخ رشید احمد نے فیصلے کا خیرمقدم کرتے ہوئے کہا کہ آج کے فیصلے سے عوام کو یہ مضبوط احساس ملا ہے کہ ملک میں عدالتیں ابھی زندہ اور فعال ہیں۔ انہوں نے جسٹس شاہد وحید اور بینچ کے دیگر اراکین کو شاندار الفاظ میں خراجِ تحسین پیش کیا اور کہا کہ قوم عدلیہ کے اس انصاف پر مبنی فیصلے کو سلام پیش کرتی ہے۔

سابق وفاقی وزیر نے زور دے کر کہا کہ سپریم کورٹ کے تین رکنی بینچ کا یہ فیصلہ عدلیہ کی آزادی اور خود مختاری کی طرف ایک انتہائی اہم پیش رفت ثابت ہوگا۔ اس فیصلے سے عدلیہ اور بالخصوص جسٹس شاہد وحید کے بینچ کا پرچم بلند ہوا ہے جس سے قانون کی حکمرانی کو تقویت ملی ہے۔

شیخ رشید نے مزید امید ظاہر کی کہ اس تاریخی فیصلے کا مثبت اثر دیگر زیرِ التوا کیسز پر بھی پڑے گا اور جیلوں میں قید دیگر بے گناہ افراد کے لیے بھی رہائی اور سہولیات کی راہ ہموار ہوگی۔ انہوں نے اپنے بیان کا اختتام یہ کہتے ہوئے کیا کہ آج کے حکم نے عدلیہ کی آزادی کو چار چاند لگا دیے ہیں۔