29 امریکی ریاستوں کا میٹا کے خلاف مقدمہ، بچوں کیلئے نقصان دہ قرار دینے کا الزام

امریکا کی 29 ریاستوں کی جانب سے فیس بک اور انسٹاگرام کی مالک کمپنی ‘میٹا’ (Meta) کے خلاف نوجوانوں کو اپنے پلیٹ فارمز کا عادی بنانے اور ان کی ذہنی صحت کو شدید نقصان پہنچانے کے الزامات پر دائر کیے گئے مقدمے کی باقاعدہ سماعت کیلیفورنیا کی وفاقی عدالت میں شروع ہو گئی ہے۔ عدالت کے مطابق اس کیس کی کارروائی 6 سے 8 ہفتوں تک جاری رہنے کا امکان ہے۔

اس مقدمے کی قیادت کیلیفورنیا، کولوراڈو، کینٹکی اور نیو جرسی کے اٹارنی جنرلز کر رہے ہیں۔ اکتوبر 2023 میں دائر 233 صفحات پر مشتمل شکایت میں میٹا پر الزام عائد کیا گیا کہ اس نے الگورتھم، لامحدود سکرولنگ اور مسلسل نوٹیفکیشنز کا ایسا ڈیزائن تیار کیا جو کم عمر صارفین کو زیادہ سے زیادہ وقت ایپ پر گزارنے پر مجبور کرتا ہے۔ اس کے علاوہ میٹا پر والدین کی اجازت کے بغیر 13 سال سے کم عمر بچوں کا ڈیٹا جمع کرنے کا بھی الزام ہے، جو امریکی وفاقی و ریاستی قوانین کی کھلی خلاف ورزی ہے۔

کیس کی سماعت کے دوران میٹا کے سی ای او مارک زکربرگ اور انسٹاگرام کے سربراہ ایڈم موسیری سمیت کئی اہم شخصیات کے بیانات قلمبند کیے جانے کا امکان ہے۔ دوسری جانب میٹا نے ان تمام الزامات کو بے بنیاد قرار دیتے ہوئے رد کر دیا ہے اور موقف اپنایا ہے کہ ریاستوں کے پاس کوئی ٹھوس شواہد موجود نہیں ہیں۔

یہ قانونی اقدام ایک ایسے وقت میں سامنے آیا ہے جب گزشتہ ہفتے ہی نیو میکسیکو کی ایک عدالت نے میٹا کو بچوں کی حفاظت سے متعلق کیس میں 567 ملین ڈالر جرمانے اور حفاظتی تدابیر اختیار کرنے کا حکم دیا ہے۔ اگر موجودہ کیس میں 29 ریاستیں کامیاب ہوتی ہیں تو میٹا کو سنگین مالی جرمانوں کے ساتھ ساتھ انسٹاگرام اور فیس بک کے بنیادیں ڈیزائن میں بڑی تبدیلیاں کرنا ہوں گی۔