ایپل کی جانب سے 110 ممالک کے صارفین کو سیکیورٹی الرٹ جاری!

ٹیکنالوجی کی عالمی کمپنی ایپل نے دنیا کے 110 سے زائد ممالک میں متعدد آئی فون صارفین کو ہنگامی سیکیورٹی الرٹس (Threat Notifications) موصول ہونے کی تصدیق کی ہے، جن میں انہیں خبردار کیا گیا ہے کہ ان کی ڈیوائسز کو انتہائی پیچیدہ ’مرسنری اسپائی ویئر‘ (Mercenary Spyware) حملے کا نشانہ بنایا گیا ہے۔ ایپل نے متاثرہ صارفین کو بھیجے گئے نوٹیفکیشن میں واضح کیا ہے کہ سسٹم نے ان کے آئی فونز پر ہونے والی اس مشکوک سرگرمی کا بروقت پتا لگا لیا ہے، لہٰذا وہ اپنے ذاتی ڈیٹا اور ڈیوائس کی حفاظت کے لیے فوری اور ضروری حفاظتی اقدامات کریں۔

ایپل کی جانب سے 2021ء میں تھریٹ نوٹیفکیشنز بھیجنے کے عمل کا آغاز کیا گیا تھا، جس کے بعد سے اب تک 150 سے زائد ممالک کے صارفین کو وقتًا فوقتاً ایسے سیکیورٹی الرٹس بھیجے جا چکے ہیں۔ کمپنی کے مطابق یہ خصوصی وارننگز ان مخصوص افراد کو بھیجی جاتی ہیں جنہیں ان کی شناخت، صحافتی و پیشہ ورانہ سرگرمیوں یا سماجی موقف کی بنیاد پر انفرادی طور پر ‘ٹارگٹڈ حملوں’ کا نشانہ بنایا جاتا ہے۔

سائبر سیکیورٹی ماہرین کا کہنا ہے کہ عام ہیکنگ یا وائرسز کے مقابلے میں مرسنری اسپائی ویئر حملے (جیسے کہ پیگاسس وغیرہ) کروڑوں ڈالر کی لاگت سے تیار کیے جانے والے انتہائی جدید اور مہنگے ٹولز ہوتے ہیں۔ اسی لیے ایپل کی جانب سے ایسا الرٹ موصول ہونے والے صارفین کو اسے عام وارننگ سمجھ کر نظر انداز نہیں کرنا چاہیے، بلکہ کمپنی کی جانب سے تجویز کردہ لاک ڈاؤن موڈ (Lockdown Mode) جیسے حفاظتی اقدامات اور سافٹ ویئر اپ ڈیٹس پر فوری عمل درآمد کرنا چاہیے۔