بغیر فریج کے محفوظ رہنے والی پہلی ویکسین کے انسانی تجربات کامیاب

سائنس دانوں نے ایک ایسی انقلابی اور نئی ویکسین کے پہلے مرحلے (فیز ون) کے کلینیکل ٹرائل میں کامیابی حاصل کر لی ہے جو فریج یا کولڈ سٹوریج کے بغیر بھی محفوظ رہ سکتی ہے۔ یہ پیش رفت دنیا بھر بالخصوص دور دراز اور گرم علاقوں میں ویکسین کی ترسیل کو انتہائی آسان اور موثر بنا سکتی ہے۔

طبی رپورٹ کے مطابق SPVX-02 نامی یہ ٹیٹنس اور ڈفتھیریا بوسٹر ویکسین StablevaX ٹیکنالوجی کے تحت تیار کی گئی ہے۔ تجربات سے ثابت ہوا کہ یہ ویکسین 30 ڈگری سینٹی گریڈ تک کے درجہ حرارت میں کم از کم 24 ماہ (2 سال) تک اپنی افادیت برقرار رکھ سکتی ہے۔ پہلے مرحلے کی آزمائش میں صحت مند بالغ افراد میں اس کا مدافعتی ردِعمل (Immune Response) موجودہ منظور شدہ ویکسینز کے بالکل برابر پایا گیا، جبکہ کوئی سنگین مضر اثرات (Side Effects) بھی سامنے نہیں آئے۔

موجودہ وقت میں زیادہ تر ویکسینز کی ترسیل اور ذخیرے کے لیے کولڈ چین (Cold Chain) یعنی مسلسل ٹھنڈا درجہ حرارت برقرار رکھنا ضروری ہوتا ہے۔ کم اور متوسط آمدنی والے ممالک میں بجلی کی عدم فراہمی، کمزور انفراسٹرکچر اور دشوار گزار جغرافیائی حالات کے باعث کروڑوں روپے کی ویکسین ضائع ہو جاتی ہے۔ ماہرین کا ماننا ہے کہ اگر اگلے مراحل میں بھی یہ ٹیکنالوجی کامیاب رہی تو یہ دنیا کے پس ماندہ علاقوں تک طبی سہولیات کی رسائی میں ایک نیا انقلاب برپا کر دے گی۔