ڈریپ کی سروے رپورٹ: 55 فیصد ادویات مہنگی فروخت ہونے کا انکشاف

وفاقی وزارتِ صحت نے قائمہ کمیٹی کو بریفنگ دیتے ہوئے انکشاف کیا ہے کہ فروری 2024 میں نان ایشینشل ادویات کو ڈی ریگولیٹ کیے جانے کے بعد سے قیمتوں کے تعین میں وزارت کا کوئی فعال کردار نہیں رہا۔ تھرڈ پارٹی کے ذریعے 6 بڑے شہروں کے 192 اسٹورز پر کیے گئے سروے کے مطابق، 2024 سے 2026 کے درمیان مختلف ادویات کی قیمتوں میں 300 فیصد تک اضافہ ریکارڈ کیا گیا ہے۔ وفاقی وزیر صحت نے کینسر کی ایک دوا کی مثال دیتے ہوئے بتایا کہ 1 لاکھ 60 ہزار والی دوا کی قیمت 1 لاکھ 80 ہزار نہ کرنے پر کمپنی نے اسے مارکیٹ سے اٹھا لیا، جو اب بلیک مارکیٹ میں ساڑھے چار لاکھ روپے میں فروخت ہو رہی ہے۔ انہوں نے مزید کہا کہ جب ملک میں ہر چیز مہنگی ہو رہی ہے تو ادویات کی قیمتوں کا بڑھنا ناگزیر ہے، لہٰذا کاروباری طبقے کو دشمن سمجھنے کے بجائے حقائق کو تسلیم کرنا ہوگا۔