بلڈ پریشر کی پرانی دوا بچوں کی خطرناک دماغی بیماری کی رفتار سست کر سکتی ہے

نیدرلینڈز کے ایمسٹرڈیم یونیورسٹی میڈیکل سینٹرز کی قیادت میں ہونے والی ایک نئی تحقیق میں انکشاف ہوا ہے کہ بلڈ پریشر کے لیے استعمال ہونے والی پرانی دوا “گوانابینز” (Guanabenz) بچوں کی نایاب اور جان لیوا جینیاتی بیماری ‘وینشنگ وائٹ میٹر’ (VWM) کی پیش رفت کو سست کر سکتی ہے۔ یہ بیماری دماغ کے سفید مادے کو نقصان پہنچا کر بچوں کی جسمانی و ذہنی صلاحیتوں کو بتدریج ختم کر دیتی ہے۔ تحقیق کے دوران تقریباً تین سال تک اس دوا کے اثرات کا جائزہ لیا گیا اور نتائج کا موازنہ دوا نہ لینے والے 66 بچوں کے گروپ سے کیا گیا۔ نتائج سے معلوم ہوا کہ گوانابینز استعمال کرنے والے بچوں میں وہیل چیئر کی ضرورت نسبتاً دیر سے پیش آئی اور اس گروپ میں کسی بچے کی موت واقع نہیں ہوئی، جبکہ دوسری جانب موازنے کے گروپ میں 5 بچے انتقال کر گئے۔ ماہرین نے اسے اس مہلک بیماری کے علاج کی سمت میں ایک اہم پیش رفت قرار دیا ہے۔