کینسر کے پھیلاؤ کی پیشگوئی کرنے والا نیا اے آئی نظام تیار

سائنس دانوں نے ایک نیا مصنوعی ذہانت پر مبنی نظام تیار کیا ہے جو کینسر کے جسم کے دوسرے حصوں تک پھیلنے کے امکانات کی پیشگوئی کر سکتا ہے۔

’مینگروو جی ایس‘ (Mangrove Gene Signatures) نامی یہ اے آئی سسٹم جینز کی پیچیدہ سرگرمیوں کے نمونوں کا تجزیہ کر کے اندازہ لگاتا ہے کہ کسی ٹیومر کے جسم کے دیگر حصوں تک پھیلنے کے امکانات کتنے ہیں۔

یہ تحقیق سائنسی جریدے Cell Reports میں شائع ہوئی ہے اور مستقبل میں ڈاکٹروں کو مریضوں میں میٹاسٹیسس یعنی کینسر کے پھیلاؤ کے خطرے کا اندازہ لگانے میں مدد دے سکتی ہے۔

ماہرین کے مطابق کینسر کے حوالے سے ایک بڑی سائنسی پہیلی یہ رہی ہے کہ کچھ ٹیومر پھیلتے نہیں جبکہ بعض تیزی سے جسم کے دوسرے حصوں تک پہنچ جاتے ہیں۔ خاص طور پر بڑی آنت، چھاتی اور پھیپھڑوں کے کینسر میں بیماری کے پھیل جانے کے بعد موت کا خطرہ نمایاں طور پر بڑھ جاتا ہے۔

اس تحقیق میں اہم کردار ادا کرنے والے ایریل روئز آئی آلتابا کے مطابق کینسر کو صرف بے ترتیب خلیاتی افزائش سمجھنا درست نہیں۔ ان کے مطابق یہ دراصل حیاتیاتی پروگراموں کا ایک مجموعہ ہے جو عموماً جسم کی ابتدائی نشوونما کے دوران فعال ہوتے ہیں لیکن بعد میں غلط وقت یا جگہ پر دوبارہ سرگرم ہو جاتے ہیں۔

محققین نے اس عمل کو سمجھنے کے لیے بڑی آنت کے ٹیومرز سے حاصل کیے گئے کلون شدہ خلیات کا مطالعہ کیا اور سینکڑوں جینز کی سرگرمیوں کا تجزیہ کیا۔ اس تحقیق کے دوران جینز کی کچھ مخصوص سرگرمیاں سامنے آئیں جو خلیات کی کینسر پھیلانے کی صلاحیت سے مضبوط تعلق رکھتی تھیں۔

انہی نتائج کی بنیاد پر سائنس دانوں نے ’مینگروو جین سگنیچرز‘ تیار کیے، جو ایک اے آئی پر مبنی نظام ہے اور بیک وقت درجنوں بلکہ سینکڑوں جینیاتی سگنیچرز کا تجزیہ کر کے کینسر کے پھیلاؤ کے خطرے کی پیشگوئی کر سکتا ہے۔