ایم ڈی کیٹ 2026 کا انعقاد آ ج ہو گا، امتحان کی تیاریاں مکمل

میڈیکل اینڈ ڈینٹل کالجز ایڈمیشن ٹیسٹ (MDCAT 2026) آ ج منعقد ہوگا، جس کے لیے پاکستان کے 34 شہروں اور سعودی عرب کے دارالحکومت ریاض میں قائم ایک بین الاقوامی امتحانی مرکز سمیت تمام تر تیاریاں مکمل کر لی گئی ہیں۔ اس سال ملک بھر سے مجموعی طور پر 1,38,160 امیدوار رجسٹرڈ ہوئے ہیں۔ صوبائی اعداد و شمار کے مطابق پنجاب سے 49,199، خیبر پختونخوا سے 38,841، سندھ سے 34,233، بلوچستان سے 9,923، آزاد کشمیر سے 2,761، گلگت بلتستان سے 1,721، اور اسلام آباد سے 1,245 امیدوار امتحان میں شریک ہوں گے، جبکہ ریاض کے سینٹر پر 237 امیدوار رجسٹرڈ ہیں۔

پاکستان میڈیکل اینڈ ڈینٹل کونسل (PMDC) کے مطابق ٹیسٹ کی شفافیت یقینی بنانے کے لیے 80 مضامین کے ماہرین پر مشتمل پینل کے ذریعے تقریباً 8 ہزار سوالات کا بینک تیار کیا گیا ہے۔ ہر صوبے کے لیے کم از کم دو علیحدہ سوالیہ پرچے تیار کیے گئے ہیں اور ہر پرچے میں 180 سوالات شامل ہوں گے۔ پی ایم ڈی سی نے واضح کیا کہ اس کا بنیادی قانونی کردار امتحانی فریم ورک، طریقہ کار اور معیارات وضع کرنا ہے، جبکہ امتحان کا عملی انعقاد اور سوالیہ پرچوں کی دیکھ بھال متعلقہ صوبائی حکام اور نامزد جامعات کی ذمہ داری ہوگی۔