حوثی مفتی کا حرمین شریفین پر حملے کا اعلان تشویشناک ہے: طاہر اشرفی

پاکستان علماء کونسل کے چیئرمین حافظ طاہر محمود اشرفی نے حوثی ملیشیا کے مفتی کی جانب سے ارضِ حرمین شریفین پر حملے کی دھمکی اور اعلان پر شدید تشویش اور برہمگی کا اظہار کرتے ہوئے اس کی سخت الفاظ میں مذمت کی ہے۔ لاہور سے جاری اپنے ایک اہم بیان میں انہوں نے کہا کہ مکہ مکرمہ اور مدینہ منورہ پر حملے کا یہ کھلا اعلان حوثیوں کے گمراہ کن عزائم کو پوری دنیا کے سامنے بے نقاب کرتا ہے، جس پر عالمِ اسلام خاموش نہیں رہ سکتا۔

طاہر اشرفی کا کہنا تھا کہ ایک طرف اسرائیل کے ساتھ حوثیوں کے مبینہ روابط اور پسِ پردہ معاہدوں کی اطلاعات سامنے آ رہی ہیں، جبکہ دوسری جانب وہ اسلامی مقدس مقامات اور مملکتِ سعودی عرب کو نشانہ بنانے کے دعوے کر رہے ہیں۔ انہوں نے سعودی عرب کی سلامتی کے دفاع میں پاک فوج کے ترجمان کے واضح اور دوٹوک بیان کو سراہتے ہوئے کہا کہ پاک فوج کا مؤقف پوری امتِ مسلمہ اور پاکستانی عوام کے جذبات کا عکاس ہے۔ چیئرمین پاکستان علماء کونسل نے زور دیا کہ حرمین شریفین کی حرمت اور سلامتی پر کوئی سمجھوتہ نہیں کیا جا سکتا اور اس مقدس سرزمین کا تحفظ ہر مسلمان کی ایمانی ذمہ داری ہے۔