پی ایم ڈی سی نے پانچ سالہ بی ڈی ایس پروگرام کا نفاذ موخر کردیا

پاکستان میڈیکل اینڈ ڈینٹل کونسل (PMDC) نے ڈینٹل ایجوکیشن سے متعلق اپنے ایک اہم فیصلے پر پیش رفت روکتے ہوئے پانچ سالہ بی ڈی ایس (BDS) پروگرام کا نفاذ مؤخر کر دیا ہے۔ پی ایم ڈی سی کی جانب سے رواں سال 8 جولائی کو جاری کیا گیا متعلقہ فریم ورک کا سابقہ نوٹیفکیشن واپس لے لیا گیا ہے، جس کی باضابطہ اطلاع ملک بھر کی تمام تسلیم شدہ میڈیکل و ڈینٹل جامعات کو مراسلے کے ذریعے فراہم کر دی گئی ہے۔

ترجمان پی ایم ڈی سی کے مطابق، بی ڈی ایس پروگرام کے تعلیمی ڈھانچے، نصاب، ہاؤس جاب اور انٹرن شپ کے مجموعی فریم ورک کا جامع جائزہ شروع کر دیا گیا ہے۔ کونسل کا کہنا ہے کہ اس تفصیلی جائزے کے بعد ہی پانچ سالہ بی ڈی ایس ڈگری پروگرام کے حتمی مستقبل اور نئے تعلیمی فریم ورک کے حوالے سے حتمی فیصلہ کیا جائے گا۔ پی ایم ڈی سی نے واضح کیا ہے کہ جائزے کا عمل مکمل ہونے پر نئے فریم ورک کی تمام تفصیلات عام کر دی جائیں گی۔