کل کی ریلی کرپٹ ترین حکومت کے خلاف علم بغاوت ہو گی: فاروق ستار

متحدہ قومی موومنٹ (ایم کیو ایم) پاکستان کے سینئر رہنما فاروق ستار نے کہا ہے کہ سندھ حکومت کے خلاف ان کی کل کی ریلی کرپٹ ترین حکمرانوں کے خلاف باضابطہ ‘علمِ بغاوت’ ثابت ہوگی۔ کراچی میں میڈیا سے گفتگو کرتے ہوئے فاروق ستار نے کہا کہ سندھ میں عوامی مسائل کا واحد حل اختیارات کی نچلی سطح پر منتقلی ہے، کیونکہ صوبے کے عوام طویل عرصے سے بنیادی سہولیات اور جائز حقوق سے محروم ہیں۔ انہوں نے الزام عائد کیا کہ پاکستان بنانے والوں کی نئی نسل کو دیوار سے لگایا جا رہا ہے جبکہ صوبے میں کرپشن کے تمام سابقہ ریکارڈ توڑ دیے گئے ہیں۔

ایم کیو ایم رہنما نے سندھ حکومت پر شدید تنقید کرتے ہوئے کہا کہ حکمرانوں نے محترمہ بے نظیر بھٹو کے خون کا سودا کیا اور ان کے گھروں کے تہہ خانوں سے اربوں ڈالر برآمد ہوتے ہیں۔ فاروق ستار نے دعویٰ کیا کہ اب سکھر، نواب شاہ، میرپورخاص اور کراچی کے عوام ان حکمرانوں کا سخت احتساب کریں گے۔ انہوں نے اعلان کیا کہ سندھ کے اندر چھ انتظامی یونٹس بننے جا رہے ہیں جن کا مکمل اختیار صوبے کے بیٹوں اور بیٹیوں کے پاس ہوگا، اور ایم کیو ایم کسی بھی دھمکی سے ڈرے بغیر عوامی حقوق کی اس تحریک کو منطقی انجام تک پہنچائے گی۔