پاکستان میں ہیگزویلنٹ ویکسین متعارف کروانے کی منظوری دے دی گئی

وفاقی وزارتِ صحت کی انٹر ڈیپارٹمنٹل کوآرڈینیشن کمیٹی نے پاکستان کے معلوماتی و حفاظتی ٹیکہ جات کے پروگرام (EPI) میں اہم پیشرفت کرتے ہوئے بچوں کے لیے ‘ہیگزویلنٹ ویکسین’ (Hexavalent Vaccine) متعارف کرانے کی باضابطہ منظوری دے دی ہے۔ وفاقی وزیرِ صحت مصطفیٰ کمال کی زیرِ صدارت منعقدہ بین الادارہ جاتی رابطہ کمیٹی کے اجلاس میں اس تاریخی فیصلے کی توثیق کی گئی۔ مصطفیٰ کمال نے بتایا کہ ‘گاوی’ (Gavi) اور دیگر عالمی شراکت داروں کے تعاون سے اس جدید ویکسین تک رسائی کے لیے گزشتہ 14 ماہ سے مسلسل کوششیں کی جا رہی تھیں۔

اجلاس کے دوران بریفنگ میں بتایا گیا کہ ہیگزویلنٹ ویکسین بیک وقت چھ مختلف مہلک بیماریوں کے خلاف تحفظ فراہم کرتی ہے، جس سے بچوں کو بار بار ٹیکے لگوانے کی تکلیف سے نجات ملے گی اور والدین کا نظامِ تحفظِ صحت پر اعتماد مزید بحال ہوگا۔ مجوزہ شیڈول کے تحت یہ ویکسین بچوں کو بالترتیب 6، 10 اور 14 ہفتے کی عمر میں دی جائے گی۔ وزیرِ صحت نے اس اہم منتقلی کی نیشنل امیونائزیشن ٹیکنیکل ایڈوائزری گروپ (NITAG) سے توثیق کا ذکر کرتے ہوئے گاوی، عالمی ادارہ صحت (WHO)، یونیسیف اور بل اینڈ ملینڈا گیٹس فاؤنڈیشن کے تعاون کا خصوصی شکریہ ادا کیا۔