وزیراعظم فیول ریلیف سکیم کی رجسٹریشن مفت، سابقہ پابندی ختم کر دی: شزا فاطمہ

وفاقی وزیر برائے آئی ٹی و ٹیلی کمیونیکیشن شزہ فاطمہ نے اعلان کیا ہے کہ وزیراعظم شہباز شریف کے خصوصی فیول ریلیف پروگرام کے تحت رجسٹریشن کا پیغام اب مکمل طور پر مفت کر دیا گیا ہے اور پٹرول ریلیف سے متعلق عائد سابقہ پابندی بھی ختم کر دی گئی ہے۔ اسلام آباد سے جاری اپنے بیان میں انہوں نے کہا کہ عالمی سطح پر تیل کی بڑھتی ہوئی قیمتوں کے پیشِ نظر حکومت عوام کو پیٹرولیم مصنوعات پر مختلف طریقوں سے ریلیف فراہم کر رہی ہے۔ انہوں نے شہریوں کو متنبہ کیا کہ وہ اپنا حساس ڈیٹا اور ذاتی معلومات کسی غیر مصدقہ شخص سے شیئر نہ کریں۔

شزہ فاطمہ نے تفصیلات بتاتے ہوئے کہا کہ 5 لیٹر سے کم پیٹرول ڈلوانے والے موٹر سائیکل، رکشہ اور چنگ چی مالکان کو ہفتہ وار 500 روپے کی رعایت دی جائے گی۔ یکم جنوری 2006ء کے بعد رجسٹرڈ ہونے والی دو اور تین پہیوں والی تمام گاڑیاں اس سکیم کے لیے اہل ہیں۔ انہوں نے انکشاف کیا کہ 14 سے 19 ستمبر کے دوران تقریباً 17 لاکھ 50 ہزار شہری سکیم کا حصہ بنے، جبکہ 18 ستمبر کو ایک ہی دن میں ریکارڈ 5 لاکھ 11 ہزار 961 افراد رجسٹرڈ ہوئے۔ اس کے علاوہ 800 سی سی تک کی گاڑیوں کے لیے 1 لاکھ 21 ہزار سے زائد ٹوکنز جاری کیے جا چکے ہیں اور اب تک 6 لاکھ 55 ہزار سے زائد شہری اس سہولت سے فائدہ اٹھا چکے ہیں۔ کسی بھی شکایت کی صورت میں شہری ہیلپ لائن 9771 پر رابطہ کر سکتے ہیں۔