جنگلات کی آگ کا دھواں دیگر فضائی آلودگی سے زیادہ نقصان دہ ہو سکتا ہے: تحقیق

امریکہ کے اعلیٰ طبي ادارے ‘آئیکن اسکول آف میڈیسن’ (Icahn School of Medicine) کے محققین نے دو اہم اور تفصیلی مطالعات میں خبردار کیا ہے کہ جنگلات کی آگ (Wildfires) سے پیدا ہونے والا دھواں انسانی صحت پر عام فضائی آلودگی کے مقابلے میں کہیں زیادہ مہلک اور سنگین اثرات مرتب کرتا ہے۔ محقق مِن ژینگ اور سینئر مصنف یاگوانگ وی کی قیادت میں کی جانے والی اس اہم تحقیق کے نتائج عالمی شہرت یافتہ طبی جرائد ‘نیچر کمیونیکیشنز’ (Nature Communications) اور ‘دی لانسیٹ اونکالوجی’ (The Lancet Oncology) میں شائع ہوئے ہیں۔

تحقیق کے دوران سائنسدانوں نے خاص طور پر انتہائی باریک آلودگی کے ذرات ‘پی ایم 2.5’ (PM2.5) کا باریک بینی سے جائزہ لیا، جو انسانی پھیپھڑوں کی گہرائی تک پہنچ کر خون کے بہاؤ میں شامل ہونے کی صلاحیت رکھتے ہیں۔ نتائج کے مطابق جنگلات کی آگ سے نکلنے والے PM2.5 کے فی یونٹ ایکسپوژر کے باعث بالترتیب دل اور سانس کی مہلک بیماریوں کے شکار مریضوں کے ہسپتال میں داخلے کا خطرہ دیگر آلودگی کے ذرائع کے مقابلے میں نمایاں طور پر زیادہ دیکھا گیا۔ اس کے علاوہ پھیپھڑوں کے کینسر (Lung Cancer) میں مبتلا مریضوں میں اس دھوئیں کے طویل مدتی اثرات کے باعث بقا اور زندگی کی شرح میں واضح کمی ریکارڈ کی گئی۔ محققین نے واضح کیا کہ فضائی آلودگی کے نقصان کا انحصار صرف اس کی مقدار پر نہیں بلکہ اس کے ذریعہ (Source) پر بھی ہوتا ہے۔ امریکہ بھر میں کروڑوں افراد تک اس دھوئیں کی رسائی کے باعث عوامی صحت کے ماہرین میں شدید تشویش لہر دوڑ گئی ہے۔