پاکستان کو فساد اور لانگ مارچ نہیں، امن و استحکام کی ضرورت ہے: احسن اقبال

وفاقی وزیر برائے منصوبہ بندی و ترقی احسن اقبال نے کہا ہے کہ پاکستان کو اس وقت دھرنوں، انتشار اور لانگ مارچ کی نہیں بلکہ اتحاد، امن اور معاشی استحکام کی شدید ضرورت ہے۔ اپنے آبائی حلقے نارووال میں ایک ٹیکنیکل کالج کی تقریب سے خطاب کرتے ہوئے احسن اقبال کا کہنا تھا کہ بیرونی سرمایہ کار صرف انہی ممالک کا رخ کرتے ہیں جہاں امن اور سیاسی استحکام ہو۔ اگر کسی ملک کی ٹی وی اسکرینوں پر ہر وقت بدامنی اور مار دھاڑ کے مناظر دکھائی دیں گے تو کوئی بھی غیر ملکی سرمایہ کار وہاں اپنا پیسہ نہیں لگائے گا۔

انہوں نے نوجوانوں پر زور دیا کہ وہ ملک میں امن اور اتحاد کی آواز بنیں اور تفریق پیدا کرنے والے عناصراور نفرت انگیز بیانیے کو مکمل طور پر مسترد کر دیں۔ سابق حکومت کی پالیسیوں پر تنقید کرتے ہوئے احسن اقبال نے کہا کہ ان کا مشن پاکستان کو دنیا کی بہترین معیشت بنانا ہے، اور اس مقصد کے لیے نوجوانوں کو مرغیوں یا کٹوں کے طعنے دینے کے بجائے اعلیٰ معیار کی ٹیکنیکل اور جدید تعلیم فراہم کرنا ہوگی۔ انہوں نے امید ظاہر کی کہ باکمال تعلیم حاصل کر کے پاکستان کے نوجوان ملک کا نام دنیا بھر میں روشن کریں گے۔