خدمت کا جذبہ جاری رہے گا، ہم جھکنے، بھاگنے اور بکنے والے نہیں: حنیف عباسی

وفاقی وزیر برائے ریلوے حنیف عباسی نے راولپنڈی میں ایک بڑے عوامی اجتماع سے خطاب کرتے ہوئے کہا ہے کہ مسلم لیگ (ن) عوام کی بلا تفریق خدمت کی سیاست پر یقین رکھتی ہے اور ترقیاتی منصوبوں کی بروقت تکمیل کا سلسلہ آئندہ بھی جاری رہے گا۔ انہوں نے واضح کیا کہ ہم جھکنے، بھاگنے یا بکنے والے نہیں ہیں، بلکہ مشکل ترین حالات کا سامنا کرتے ہوئے بھی ہمیشہ ملک اور قوم کے ساتھ کھڑے رہے ہیں۔ ان کا کہنا تھا کہ آزاد کشمیر کے انتخابات میں راولپنڈی کی تینوں نشستوں پر مسلم لیگ (ن) کی کامیابی عوام کے اس اعتماد کا ثبوت ہے جو وہ نواز شریف، شہباز شریف اور مریم نواز کی قیادت پر رکھتے ہیں۔

حنیف عباسی نے راولپنڈی میں جاری و مکمل شدہ ترقیاتی کاموں پر روشنی ڈالتے ہوئے کہا کہ شہر کو تمام میگا پراجیکٹس مسلم لیگ (ن) کے ادوارِ حکومت میں ملے۔ نواز شریف نے شہر کو کرکٹ اسٹیڈیم دیا، شہباز شریف نے تعلیمی ادارے اور ہسپتال بنائے، جبکہ مریم نواز کی جانب سے گرین بس سروس اور بنیادی ڈھانچے کے منصوبے فراہم کیے گئے ہیں۔ انہوں نے اپنے سیاسی سفر کا ذکر کرتے ہوئے کہا کہ انہوں نے جیلیں کاٹیں اور چھ فٹ کے تنگ سیل میں رہے لیکن کبھی پاکستان کے خلاف نہیں گئے اور نہ ہی روئے۔ انہوں نے زور دیا کہ ملک دشمن چاہے کتنے ہی کھیل کیوں نہ کھیل لیں، ہمارے لیے پاکستان سے بڑی کوئی دولت یا فیکٹری نہیں ہے۔