احتجاج کے حوالے سے ہماری پالیسی کلیئر، کسی صورت اجازت نہیں دیں گے: عطا تارڑ

وفاقی وزیرِ اطلاعات و نشریات عطا اللہ تارڑ نے واضح کیا ہے کہ دارالحکومت میں احتجاج سے متعلق حکومت کی پالیسی بالکل واضح اور دوٹوک ہے، اور کسی کو بھی اسلام آباد میں احتجاج کرنے کی اجازت نہیں دی جائے گی۔ ایک نجی ٹی وی شو میں گفتگو کرتے ہوئے عطا تارڑ کا کہنا تھا کہ پاکستان تحریکِ انصاف (پی ٹی آئی) کی تاریخ پرتشدد مظاہروں سے بھری پڑی ہے اور اس حوالے سے اعلیٰ عدلیہ کا فیصلہ بھی آ چکا ہے۔ اس لیے قانون کی بالادستی یقینی بناتے ہوئے کسی دباؤ یا نرمی کے بغیر اسلام آباد میں پی ٹی آئی کو ہرگز مظاہرہ کرنے کی اجازت نہیں ہوگی۔

خیبر پختونخوا کی امن و امان کی صورتِ حال پر تشویش کا اظہار کرتے ہوئے وفاقی وزیر نے کہا کہ کوہاٹ میں لاشیں گر رہی ہیں اور صوبائی حکومت و وزیراعلیٰ اپنی ذمہ داریوں سے منہ موڑے ہوئے ہیں۔ جماعت اسلامی اور پی ٹی آئی کے ممکنہ اتحاد یا مشترکہ احتجاج پر بات کرتے ہوئے عطا تارڑ کا کہنا تھا کہ دونوں جماعتوں کا ‘ڈی این اے’ ایک دوسرے سے بالکل مختلف ہے۔ جماعت اسلامی کے کارکن پرامن ہیں جن کے جلسوں میں کبھی نقصان نہیں ہوتا، جبکہ پی ٹی آئی کا شیوا توڑ پھوڑ ہے۔ انہوں نے جماعت اسلامی کو بھی اسلام آباد نہ آنے کا مشورہ دیتے ہوئے کہا کہ قانون کی خلاف ورزی پر بلا تفریق کارروائی کی جائے گی۔