جمائما گولڈ سمتھ نے آئرش بزنس مین کیمرون اورلی سے دوسری شادی کرلی

بانی پی ٹی آئی اور سابق وزیراعظم عمران خان کی سابقہ اہلیہ جمائما گولڈ سمتھ نے دوسری شادی کر لی ہے۔ برطانوی اخبار ‘ڈیلی میل’ کے مطابق 52 سالہ فلم و دستاویزی پروڈیوسر جمائما گولڈ سمتھ نے 62 سالہ آئرش آسٹریلوی بزنس مین کیمرون اورلی کے ساتھ ایک سادہ مگر پروقار تقریب میں شادی رچائی ہے، جس کی تصدیق ان کے بھائی نے بھی کر دی ہے۔ رپورٹس کے مطابق ایوارڈ یافتہ پروڈیوسر جمائما اور کیمرون اورلی کی پہلی ملاقات فلموں اور دستاویزی منصوبوں کے سلسلے میں کام کے دوران ہوئی تھی۔

شادی کی سامنے آنے والی تصاویر میں یہ جوڑا ایک شاندار تاریخی عمارت کے احاطے میں کنول کے تالاب کے کنارے موجود دکھائی دیا۔ تقریب کے لیے جمائما نے نباتاتی نقش و نگار والا دلکش لباس زیب تن کیا، جبکہ کیمرون اورلی روایتی مارننگ کوٹ اور ویسٹ کوٹ میں نظر آئے۔ واضح رہے کہ جمائما گولڈ سمتھ کی پہلی شادی 1995 میں پاکستان کے سابق وزیراعظم عمران خان سے ہوئی تھی جو 9 برس قائم رہنے کے بعد 2004 میں طلاق پر ختم ہوئی۔