پی ٹی آئی کارکنوں کی نظر بندی: ڈی سی لاہور اور شیخوپورہ سے رپورٹ طلب

لاہور ہائیکورٹ نے پی ٹی آئی کارکنوں کی غیر قانونی نظر بندی کے خلاف دائر درخواست پر سماعت کرتے ہوئے ڈپٹی کمشنر (ڈی سی) لاہور اور شیخوپورہ سے تفصیلی رپورٹ طلب کر لی ہے۔ عدالت کی جسٹس عبہر گل خان نے راول شہزاد اور دیگر کی درخواستوں پر سماعت کی۔ دورانِ سماعت درخواست گزار کے وکیل عرفان کلار ایڈووکیٹ نے مؤقف اختیار کیا کہ راشد اور جاوید اقبال سمیت دیگر پی ٹی آئی کارکنوں کی نظر بندی کی مدت ختم ہونے کے باوجود انہیں رہا نہیں کیا گیا، بلکہ ڈپٹی کمشنرز نے بغیر کسی معقول وجہ کے نظر بندی کے نئے نوٹیفکیشن جاری کر دیے ہیں جو کہ سراسر غیر آئینی اقدام ہے۔ وکیل نے عدالت سے استدعا کی کہ کارکنوں کی نظر بندی کے نوٹیفکیشن کالعدم قرار دے کر ان کی فوری رہائی کا حکم دیا جائے، جس پر عدالت نے متعلقہ حکام سے جواب طلب کر لیا۔