پنجاب میں 20 کلو آٹے کا تھیلا بند، سمگلنگ روکنے کیلئے کڑی نگرانی کا حکم

پنجاب حکومت نے صوبے بھر میں آٹے کی دستیابی اور فراہمی کو بہتر بنانے کے لیے اہم اقدام اٹھاتے ہوئے 20 کلو آٹے کا تھیلا بند کرنے اور مارکیٹ میں صرف 10 کلو آٹے کا بیگ متعارف کرانے کا فیصلہ کیا ہے۔

وزیراعلیٰ پنجاب مریم نواز شریف کی زیرِ صدارت منعقدہ اعلیٰ سطح کے اجلاس میں گندم اور آٹے کی غیر قانونی نقل و حمل اور اسملنگ روکنے کے لیے بین الصوبائی سرحدوں کی کڑی نگرانی کا حکم دیا گیا۔ وزیراعلیٰ نے تمام ڈپٹی کمشنرز کو ہدایت کی کہ اپنے اضلاع میں گندم کی کاشت کے اہداف پورے کیے جائیں۔ فیصلہ کیا گیا کہ نمبردار، گھوڑی پال سکیم اور ‘اپنا کھیت، اپنا روزگار’ کے تحت آنے والی تمام سرکاری و معاوضہ اراضی پر گندم کی کاشت لازمی ہوگی۔

اجلاس میں رمضان المبارک کے لیے کیلا، سیب اور کھجور کنٹرول نرخوں پر فراہم کرنے کے لیے کولڈ اسٹوریج گنجائش بڑھانے کی ہدایت کی گئی۔ مزید برآں، پنجاب میں پہلی بار ‘ٹرانسفارمنگ مارکیٹ ویسٹ ان ٹو ویلتھ’ منصوبے، آف سیزن سبزیوں کے لیے ڈی ہائیڈریشن پروجیکٹ اور کاہنہ میں صوبے کے پہلے ‘منڈی مارٹ’ کو جلد مکمل کرنے کی منظوری دی گئی۔ حکومت نے کھلے دودھ کی فروخت کو ریگولیٹ کرنے کے لیے بھی سخت اقدامات اٹھانے کا اعلان کیا ہے