پاکستان بھارتی حمایت یافتہ دہشت گردوں کے خلاف کاروائیاں جاری رکھے گا: فیلڈ مارشل

چیف آف ڈیفنس فورسز فیلڈ مارشل سید عاصم منیر نے کہا ہے کہ پاکستان بھارتی حمایت یافتہ دہشت گردوں کے خلاف بلاامتیاز کارروائیاں جاری رکھے گا اور ان خوارج و شرپسندوں کو جہاں بھی پایا گیا مکمل طور پر کچل دیا جائے گا۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے کور ہیڈکوارٹرز پشاور کا دورہ کیا، جہاں پہنچنے پر کمانڈر پشاور کور نے ان کا استقبال کیا۔ دورے کے دوران انہیں خیبر پختونخوا کی سیکیورٹی صورتِ حال، انسدادِ دہشت گردی کی کارروائیوں، سرحدوں پر انتظامی امور اور فارمیشنز کی آپریشنل تیاریوں پر تفصیلی بریفنگ دی گئی۔ فیلڈ مارشل نے جوانوں اور افسران کے پیشہ ورانہ جذبے اور چوکسی کو سراہتے ہوئے ہدایت کی کہ سیکیورٹی خطرات کا موثر مقابلہ کرنے کے لیے اعلیٰ ترین سطح کی تیاریاں برقرار رکھی جائیں۔ انہوں نے کہا کہ قوم اور سیکیورٹی فورسز کے شہداء اور غازیوں کی قربانیاں رائیگاں نہیں جائیں گی اور عوام کی پُرزور حمایت سے دہشت گردوں اور ان کے گمراہ کن نظریات کو حتمی شکست دی جائے گی۔