پاکستان اور کینیڈا کے طبی اداروں میں تعاون کیلئے مفاہمتی یادداشت پر دستخط

پاکستان اور کینیڈا کے معروف طبی اداروں نے پوسٹ گریجویٹ میڈیکل تعلیم، تربیت اور پیشہ ورانہ صلاحیتوں کے فروغ کے لیے ایک اہم مفاہمتی یادداشت (MoU) پر دستخط کر دیے ہیں۔

اوٹاوا میں پاکستانی ہائی کمیشن کی میزبانی میں منعقدہ تقریب میں کالج آف فزیشنز اینڈ سرجنز پاکستان (CPSP) اور رائل کالج آف فزیشنز اینڈ سرجنز آف کینیڈا (RCPSC) کے اعلٰی سطح کے وفود نے شرکت کی۔ پاکستانی وفد کی قیادت سی پی ایس پی کے صدر پروفیسر ڈاکٹر خالد مسعود گوندل نے کی، جبکہ کینیڈین وفد کی سربراہی آر سی پی ایس سی کے چیف ایگزیکٹو آفیسر ڈاکٹر کرسٹوفر واٹلنگ نے کی۔

طے پانے والے معاہدے کے تحت دونوں ادارے پوسٹ گریجویٹ طبی تعلیم و تربیت، ادارہ جاتی صلاحیتوں میں اضافے، اور باہمی دلچسپی کے شعبوں میں بہترین بین الاقوامی طریقہ کار اور تجربات کے تبادلے کے لیے مشترکہ اقدامات کریں گے۔