لانگ مارچ کی تیاری کر رہے ہیں، اسلام آباد جائیں گے: حافظ نعیم الرحمٰن

امیر جماعت اسلامی حافظ نعیم الرحمٰن نے کہا ہے کہ کراچی کے غیور عوام نے جماعت اسلامی کو ووٹ دیا تھا لیکن ان کا مینڈیٹ چوری کر کے قبضہ میئر کو مسلط کیا گیا جو بلدیاتی اختیارات روکے بیٹھے ہیں۔ کراچی کے علاقے گودھرا کالونی میں اسکول کی افتتاحی تقریب سے خطاب کرتے ہوئے انہوں نے کہا کہ جماعت اسلامی کے ٹاؤن چیئرمین محدود اختیارات میں بھی عوامی خدمت کی شاندار مثال قائم کر رہے ہیں۔ انہوں نے وفاقی حکومت کو تنقید کا نشانہ بناتے ہوئے کہا کہ ملک میں ڈھائی کروڑ افراد کی سواری موٹرسائیکل ہے، اس لیے پٹرولیم لیوی ٹیکس اور پٹرول کی قیمتیں کم کی جائیں تاکہ عوام کو ریلیف مل سکے۔ حافظ نعیم الرحمٰن نے گندم کے بحران، آئی پی پیز کے معاہدوں اور مہنگائی پر کڑی تنقید کرتے ہوئے اعلان کیا کہ حکومت کی عوام دشمن پالیسیوں اور زمینوں پر قبضوں کے خلاف اب اسلام آباد کی طرف لانگ مارچ کی تیاری کی جا رہی ہے۔