کے پی کے میں گورنر راج کا فیصلہ غلط، ملک معاشی تباہی کی طرف جا رہا ہے،علامہ ناصر عباس

سینیٹ کے اجلاس میں قائدِ حزبِ اختلاف علامہ ناصر عباس نے خطاب کرتے ہوئے خیبر پختونخوا میں گورنر راج کے نفاذ، ملک میں بڑھتی ہوئی مہنگائی اور مشرقِ وسطیٰ کی صورتِ حال پر شدید تشویش کا اظہار کیا ہے۔ انہوں نے کہا کہ ایران سے یمن تک کا پورا خطہ بشمول آبنائے ہرمز اور باب المندب جنگ کی لپیٹ میں ہے جس سے توانائی کا شدید بحران جنم لے رہا ہے، تاہم ملک میں سیاست دان اصل مسائل چھوڑ کر صوبوں کو فتح کرنے کی سیاست کر رہے ہیں۔ انہوں نے کہا کہ پنجاب میں آٹے اور ایل پی جی کی شارٹیج اور پیٹرولیم مصنوعات کی گرانی کے باعث پورا سسٹم مفلوج ہو چکا ہے لیکن حکومت نے صرف خیبر پختونخوا کو نشانہ بنایا، حالانکہ انصاف اور آئین کی بالادستی کے بغیر معاشرہ تباہی کی طرف جائے گا۔ قائدِ حزبِ اختلاف نے مطالبہ کیا کہ حکومت کو سعودی عرب اور یمن کے درمیان ثالثی کا کردار ادا کرنا چاہیے تاکہ خطے کو مزید تباہی سے بچایا جا سکے۔