لسبیلہ: مسافر بس اور وین میں تصادم، 11 افراد جاں بحق، متعدد زخمی

بلوچستان کے ضلع لسبیلہ میں اوتھل زیرو پوائنٹ کے مقام پر مسافر بس اور وین میں خوفناک تصادم کے نتیجے میں 3 خواتین سمیت 11 افراد جاں بحق جبکہ 20 سے زائد افراد شدید زخمی ہو گئے ہیں۔ پولیس حکام کے مطابق حادثہ اس وقت پیش آیا جب گوادر سے کراچی جانے والی مسافر بس اور کراچی سے لسبیلہ کی طرف آنے والی وین میں آمنے سامنے زوردار ٹکر ہو گئی۔ حادثے کے فوراً بعد پولیس اور امدادی ٹیموں نے موقع پر پہنچ کر لاشوں اور زخمیوں کو قریب ترین ہسپتال منتقل کیا جہاں کئی افراد کی حالت تشویشناک بتائی جاتی ہے۔ پولیس نے واقعے کی باقاعدہ تحقیقات اور حادثے کی وجوہات معلوم کرنے کے لیے کارروائی کا آغاز کر دیا ہے۔