چین میں زلزلے سے سینکڑوں مکان منہدم، 16 افراد ہلاک، پاکستان کی مدد کی پیشکش

چین کے خود مختار علاقے تبت میں 7.1 شدت کے شدید زلزلے نے بڑی تباہی مچائی ہے، جس کے نتیجے میں کم از کم 16 افراد ہلاک اور 65 زخمی ہو گئے ہیں، جبکہ سینکڑوں مکانات زمیں بوس ہو گئے ہیں۔ افتاد کے بعد پاکستان کے وزیراعظم شہباز شریف نے چینی قیادت اور عوام سے گہرے دکھ اور یکجہتی کا اظہار کرتے ہوئے ہر ممکن مدد کی پیشکش کی ہے۔

امریکی جیولوجیکل سروے (USGS) کے مطابق زلزلے کی گہرائی 18 کلومیٹر تھی اور اس کا مرکز ناگچو (Nagqu) شہر سے 191 کلومیٹر شمال مشرق میں تھا۔ زلزلے کے بعد 4.3 سے 5.2 شدت کے 7 سے زائد آفٹر شاکس بھی محسوس کیے گئے، جس سے ناگچو شہر میں 339 سے زائد مکانات منہدم ہو گئے۔ لینڈ سلائیڈنگ کے باعث نیشنل ہائی وے 317 کو عام آمدورفت کے لیے بند کر دیا گیا ہے، جبکہ مواصلاتی اور ریلوے نظام کو بھی شدید نقصان پہنچا ہے۔ آئندہ تین دنوں میں برف باری کی پیشگوئی کے پیشِ نظر 1,600 سے زائد امدادی اہلکار، ہزاروں خیمے، فولڈنگ بیڈز، گرم کپڑے اور خوراک کے ساتھ امدادی کارروائیوں میں مصروف ہیں۔ چینی صدر شی جن پنگ نے تمام دستیاب وسائل کو فوری ریسکیو عملیات کے لیے متحرک کرنے کے احکامات جاری کر دیے ہیں۔

پاکستانی وزیراعظم شہباز شریف نے سوشل میڈیا پلیٹ فارم ‘ایکس’ پر جاری بیان میں صدر شی جن پنگ اور چین کی عوام بالخصوص متاثرہ خاندانوں سے دلی تعزیت کی۔ انہوں نے کہا کہ پاکستان اس مشکل گھڑی میں اپنے آئرن برادر چین کے ساتھ مکمل یکجہتی کے ساتھ کھڑا ہے اور ہر قسم کے تعاون کے لیے تیار ہے۔