وفاق نے کے پی کیلئے 160 ارب روپے کے فنڈز کی یقین دہانی کرائی: فیصل کنڈی

گورنر خیبر پختونخوا فیصل کریم کنڈی نے اعلان کیا ہے کہ وفاقی حکومت کی جانب سے صوبے کو 160 ارب روپے کے فنڈز فراہم کیے جائیں گے اور ضرورت پڑنے پر مزید مالی معاونت بھی دی جائے گی۔ پشاور میں مشیرِ اطلاعات ثمر ہارون بلور کے ہمراہ نیوز کانفرنس کرتے ہوئے گورنر نے پشاور میں منعقدہ نیشنل ایکشن پلان کی ایپکس کمیٹی کے اجلاس کو تاریخ ساز قرار دیا، جس میں وزیراعظم شہباز شریف اور فیلڈ مارشل سمیت اعلیٰ قیادت نے صوبے کے مسائل پر تفصیلی غور کیا۔ فیصل کریم کنڈی نے کہا کہ صوبے میں تبادلوں اور تعنیاتیوں میں شفافیت، سرکاری ملازمین کی حاضری اور کرپشن پر زیرو ٹالرنس کی پالیسی اپنائی جا رہی ہے، جبکہ شہداء کے لیے خصوصی پیکج کا اعلان بھی کیا گیا ہے۔ اس موقع پر مشیرِ اطلاعات ثمر ہارون بلور اور محمود جان نے زور دیا کہ دہشت گردی کا خاتمہ بقا کی جنگ ہے جسے ترقیاتی کاموں اور قانون کی بالادستی کے ذریعے جیتا جائے گا۔