فلم ’گھوسٹ اسکول‘ 3 ماہ کی قانونی جدوجہد کے بعد سندھ میں ریلیز کیلئے تیار

سندھ میں غیر فعال تعلیمی اداروں اور بچیوں کی تعلیم کے اہم مسائل کو اجاگر کرنے والی پاکستانی فلم ’گھوسٹ اسکول‘ (Ghost School) کی ریلیز کی تمام رکاوٹیں دور ہو گئی ہیں۔ تین ماہ طویل قانونی جدوجہد کے بعد سندھ ہائی کورٹ نے فلم کو بغیر کسی کٹوتی یا سنسر کٹ کے نمائش کے لیے پیش کرنے کی اجازت دے دی ہے۔

ہدایت کارہ سیماب گل کے مطابق سندھ سنسر بورڈ نے فلم کے بعض مناظر حذف کرنے کا مطالبات کیا تھا، جس کے خلاف انہوں نے عدالتِ عالیہ سے رجوع کیا تھا۔ اس فلم کی کہانی ‘رابعہ’ نامی ایک 10 سالہ بچی کے گرد گھومتی ہے جو اپنے گاؤں کے واحد بند اسکول اور اس کے آسیب زدہ ہونے کے حوالے سے پھیلی افواہوں کی حقیقت تلاش کرتی ہے۔ فلم کی افغان نژاد جرمن سنیماٹوگرافر زمرین وحدت نے افغانستان میں خواتین اور لڑکیوں کی تعلیم پر طالبان کی پابندیوں کے تناظر میں اس فلم میں بغیر کسی معاوضے (فری) کے کام کیا۔

دلچسپ بات یہ ہے کہ پاکستان میں قانونی و انتظامی رکاوٹوں کا شکار ہونے والی یہ فلم برلن انٹرنیشنل فلم فیسٹیول اور جرمنی کے 11 سنیما گھروں میں پہلے ہی نمائش کے لیے پیش کی جا چکی ہے۔ ہدایت کارہ سیماب گل کا کہنا ہے کہ سندھ ہائی کورٹ کے فیصلہ کن حکم کے بعد اب یہ فلم 30 اکتوبر کو پنجاب اور سندھ بھر کے سنیما گھروں میں ریلیز کی جائے گی