پی ایس ایل 11 کے لیے پلیئرز ٹریڈ ونڈو کھل گئی

ایچ بی ایل پاکستان سپر لیگ (پی ایس ایل) کے 11ویں ایڈیشن کے لیے ٹریڈ ونڈو کا باقاعدہ آغاز کر دیا گیا ہے، جو 18 مارچ تک کھلی رہے گی۔ اس مدت کے دوران تمام فرنچائزز لیگ کے مقررہ قواعد اور تنخواہ کی حد (سیلری کیپ) کے اندر رہتے ہوئے کھلاڑیوں کا تبادلہ یا خرید و فروخت کر سکیں گی۔ پی سی بی کے قوانین کے مطابق دو فرنچائزز آپس میں کھلاڑی تبدیل کرنے کے ساتھ ساتھ بقیہ بجٹ سے طے شدہ رقم کے عوض بھی کسی کھلاڑی کو اپنی ٹیم کا حصہ بنا سکتی ہیں، تاہم ہر ٹریڈ کے لیے پاکستان کرکٹ بورڈ کی حتمی منظوری لازمی قرار دی گئی ہے۔

اس بار ملتان سلطانز کے حصول کے حوالے سے پیدا ہونے والے غیر معمولی حالات کے پیش نظر، دیگر ٹیموں کی رضامندی سے سلطانز کو سیلری کیپ میں ایک کروڑ 20 لاکھ روپے کی اضافی رعایت دی گئی ہے۔ اس کے علاوہ ملتان سلطانز کو 22 کھلاڑیوں پر مشتمل اسکواڈ منتخب کرنے کی اجازت بھی ہوگی، جبکہ دیگر ٹیموں کے لیے اسکواڈ کی حد کم رکھی گئی ہے، تاہم میچ ڈے پر تمام ٹیمیں 20 پلیئرز تک ہی محدود رہیں گی۔ واضح رہے کہ پی ایس ایل کے 11ویں ایڈیشن میں پہلی بار 8 ٹیمیں ایکشن میں نظر آئیں گی اور ٹورنامنٹ کے مقابلے 26 مارچ سے 3 مئی تک ملک کے 6 مختلف شہروں میں منعقد کیے جائیں گے۔