امریکی وزارتِ خارجہ کا دنیا بھر میں امیگرینٹ ویزا انٹرویوز کا عمل عارضی طور پر معطل کرنے کا اعلان

واشنگٹن: امریکی وزارتِ خارجہ (State Department) نے دنیا بھر میں قائم امریکی سفارت خانوں اور قونصل خانوں میں امیگرینٹ (مستقل رہائش کے) ویزا انٹرویوز کا عمل عارضی طور پر روک دیا ہے تاکہ قونصلر افسران کو “پبلک چارج” (Public Charge) کی نئی اور سخت جانچ پڑتال سے متعلق تربیت دی جا سکے۔

میڈیا رپورٹس کے مطابق امریکی حکام نے اگست کے اوائل میں اس عالمی تربیتی پروگرام کا آغاز کیا ہے۔ اس اقدام کے بعد جن درخواست گزاروں کے انٹرویوز پہلے سے طے شدہ تھے، انہیں آگاہ کر دیا گیا ہے کہ ان کے انٹرویوز کی تاریخیں تبدیل کی جا رہی ہیں اور نئی تاریخوں کا اعلان بعد میں کیا جائے گا۔ البتہ غیر ملکی ملازمین، کاروباری اور خاندانی گرین کارڈ کے ویزا انٹرویوز معمول پر کب آئیں گے، اس حوالے سے امریکی وزارت خارجہ نے کوئی حتمی تاریخ نہیں بتائی۔

امریکی وزارتِ خارجہ کا کہنا ہے کہ اس تربیت کا بنیادی مقصد قونصلر افسران کو اس قابل بنانا ہے کہ وہ جامع اور یکساں انداز میں یہ جانچ سکیں کہ آیا کوئی ویزا درخواست دہندہ امریکہ پہنچ کر سرکاری یا عوامی امداد پر بوجھ (“پبلک چارج”) تو نہیں بنے گا۔

یہ فیصلہ ایک امریکی وفاقی عدالت کی جانب سے ٹرمپ انتظامیہ کی 75 ممالک کے شہریوں پر عائد کردہ ویزا پابندیوں کو کالعدم قرار دیے جانے کے چند ہی دنوں بعد سامنے آیا ہے۔ 21 اگست کو امریکی ڈسٹرکٹ جج جینیٹ ورگاس نے اپنے فیصلے میں کہا تھا کہ حکومت کے پاس اس بنیاد پر مخصوص ممالک کے ویزے مکمل معطل کرنے کا قانونی اختیار نہیں تھا۔

امریکی حکام نے درخواست گزاروں کو ہدایت کی ہے کہ وہ متعلقہ سفارت خانوں کی ای میلز پر نظر رکھیں اور واضح کیا ہے کہ انٹرویو منسوخ یا مؤخر ہونے کا مطلب ویزا کی منسوخی یا درخواست کا رد ہونا ہرگز نہیں ہے۔