امریکا، ایران مذاکرات کی بحالی کیلئے رابطے جاری ہیں: قطر

دوحہ: ترجمان قطری وزارتِ خارجہ ماجد الانصاری نے انکشاف کیا ہے کہ امریکا اور ایران کے درمیان سفارتی مذاکرات کی بحالی کے لیے قطری حکام کے اعلیٰ سطحی رابطے مسلسل جاری ہیں۔

میڈیا کو بریفنگ دیتے ہوئے ماجد الانصاری نے بتایا کہ قطری حکام روزانہ کی بنیاد پر تمام متعلقہ فریقوں کے ساتھ ٹیلی فونک رابطے کر رہے ہیں، جبکہ مذاکرات کی دوبارہ شروعات کے لیے ایرانی حکام سے بھی براہِ راست بات چیت جاری ہے۔ انہوں نے کہا کہ فریقین کو دوبارہ مذاکرات کی میز پر لانے کے لیے مختلف تجاویز اور عملی طریقہ کار پر غور کیا جا رہا ہے۔

ترجمان نے واضح کیا کہ قطر اور پاکستان کی مشترکہ زیرِ قیادت جاری ثالثی کے عمل میں تمام فریقوں کی مکمل شمولیت پر زور دیا جا رہا ہے تاکہ بحران کا دیرپا حل نکالا جا سکے۔

ماجد الانصاری کا مزید کہنا تھا کہ موجودہ علاقائی بحران سے نکلنے کا واحد راستہ صرف اور صرف مذاکرات ہیں۔ انہوں نے تاکید کی کہ اس وقت قطر کی اولین ترجیح آبنائے ہرمز میں بحری آمدورفت اور جہاز رانی کو معمول پر بحال کرنا ہے، جس کے لیے قطر کشیدگی میں کمی، فوری جنگ بندی اور سفارتی بات چیت کی مکمل حمایت کر رہا ہے۔