بجلی تقسیم کار کمپنیوں سے قومی خزانے کو 472 ارب روپے کا نقصان ہوا ، نیپرا رپورٹ جاری

اسلام آباد: نیشنل الیکٹرک پاور ریگولیٹری اتھارٹی نے بجلی کی تقسیم کار کمپنیوں کی کارکردگی سے متعلق رپورٹ برائے 2024-25 جاری کر دی ہے، جس میں انکشاف کیا گیا ہے کہ کمپنیوں نے ایک سال کے دوران قومی خزانے کو 472 ارب روپے کا نقصان پہنچایا۔

رپورٹ کے مطابق یہ نقصان ترسیل و تقسیم کے نقصانات اور بجلی بلوں کی کم وصولیوں کی مد میں ہوا۔ دستاویز میں بتایا گیا ہے کہ ترسیل اور تقسیم کے شعبے میں 265 ارب روپے جبکہ کم ریکوری کی مد میں 207 ارب روپے کا خسارہ سامنے آیا۔

رپورٹ میں کہا گیا ہے کہ تقسیم کار کمپنیاں ترسیل و تقسیم کے نقصانات کا مقررہ ہدف حاصل کرنے میں ناکام رہیں، جس کے باعث شعبہ توانائی کو مستقل چیلنجز کا سامنا ہے۔

اتھارٹی نے بجلی بلوں کی کم وصولیوں پر بھی تشویش کا اظہار کرتے ہوئے خبردار کیا ہے کہ ان نقصانات کے نتیجے میں گردشی قرض میں مزید اضافہ ہوتا ہے، جو قومی معیشت پر بوجھ بنتا جا رہا ہے۔