190 ملین پاؤنڈ کیس: عمران خان کے وکیل کا قید تنہائی اور صحت سے متعلق سنگین خدشات کا اظہار

اسلام آباد ہائیکورٹ میں چیف جسٹس سرفراز ڈوگر اور جسٹس محمد آصف پر مشتمل بنچ نے 190 ملین پاؤنڈ کیس میں سزا معطلی کی درخواستوں پر سماعت کی۔ بانی پی ٹی آئی کے وکیل بیرسٹر سلمان صفدر نے عدالت کو بتایا کہ عمران خان کی 85 فیصد بینائی متاثر ہو چکی ہے اور وہ ایک آنکھ سے دیکھنے میں شدید دشواری کا شکار ہیں۔ وکیل نے انکشاف کیا کہ بانی پی ٹی آئی کو 22 گھنٹے اور بشریٰ بی بی کو 24 گھنٹے قیدِ تنہائی میں رکھا جا رہا ہے، جو کہ انسانی حقوق کی خلاف ورزی اور “ٹارچر” کے زمرے میں آتا ہے۔ عدالت کو بتایا گیا کہ عدالتی حکم کے باوجود بشریٰ بی بی سے ملاقات نہیں کرائی جا رہی۔ چیف جسٹس نے اپیلوں پر جلد سماعت کا عندیہ دیتے ہوئے ریمارکس دیے کہ عدالت روزانہ کی بنیاد پر سماعت کے لیے تیار ہے، تاہم وکیل صفائی نے پہلے سزا معطلی کی درخواستوں پر دلائل دینے کی استدعا کی۔