ملک بھر میں گیس بحران بڑھنے لگا، گھریلو کنکشن پر پاپندی

پاکستان میں گیس کا بحران شدت اختیار کر گیا ہے، جس کے باعث سوئی گیس حکام نے نئے گھریلو کنکشنز لگانے کا عمل فوری طور پر روک دیا ہے۔ ذرائع کے مطابق ری لکویفائیڈ نیچرل گیس (RLNG) کی سپلائی میں کمی کی وجہ سے پہلے سے دی گئی درخواستوں پر عملدرآمد معطل کر دیا گیا ہے، جبکہ ارجنٹ واؤچر اور ڈیمانڈ نوٹس جمع کروانے والے ہزاروں صارفین بھی اب انتظار کی فہرست میں چلے گئے ہیں۔ سوئی ناردرن کے سینئر جنرل منیجر عمران یوسف کا کہنا ہے کہ یہ پابندی عارضی ہے اور گیس کی فراہمی میں بہتری آتے ہی کنکشنز کا عمل دوبارہ شروع کر دیا جائے گا۔ واضح رہے کہ ملک بھر میں گیس کی کمی کے باعث موجودہ صارفین کو بھی صرف مخصوص اوقات میں گیس فراہم کی جا رہی ہے۔