26 نومبر 2024 احتجاج پر درج مقدمہ میں علیمہ خان کے وارنٹ گرفتاری جاری

انسدادِ دہشت گردی عدالت (اے ٹی سی) میں علیمہ خان کے خلاف مقدمے کی سماعت کل جمعرات تک ملتوی کر دی گئی۔ مقدمے کی سماعت اے ٹی سی کے جج امجد علی شاہ نے کی۔ ملزمہ کی جانب سے وکیل فیصل ملک جبکہ سرکار کی طرف سے پراسیکیوٹر ظہیر شاہ عدالت میں پیش ہوئے۔

سماعت کے دوران پانچ ملزمان کے وکلاء نے دس گواہوں پر جرح مکمل کر لی، تاہم دیگر گواہان پر جرح آج نہ ہو سکی۔ اس موقع پر پراسیکیوٹر ظہیر شاہ نے عدالت کو بتایا کہ مقدمے کی اب تک 28 سماعتیں ہو چکی ہیں اور علیمہ خان کے طرزِ عمل کے باعث کیس مسلسل تاخیر کا شکار ہے، لہٰذا مقدمے کی روزانہ کی بنیاد پر سماعت کا حکم دیا جائے۔

عدالت میں علیمہ خان کی حاضری سے استثنیٰ کی درخواست پر پراسیکیوشن نے اعتراض اٹھایا اور مؤقف اختیار کیا کہ درخواست کے ساتھ لاہور میں زیر سماعت مقدمات کی کاز لسٹ منسلک نہیں کی گئی۔ عدالت نے اعتراض منظور کرتے ہوئے علیمہ خان کی حاضری سے استثنیٰ کی درخواست مسترد کر دی اور ان کے وارنٹ گرفتاری جاری کر دیئے۔