’کراچی پسند نہیں‘ کے بیان پر تنقید ، صبا قمر کی وضاحت سامنے آگئی

کراچی: (ویب ڈیسک) اداکارہ صبا قمر نے کراچی سے متعلق اپنے بیان پر ہونے والی شدید تنقید کے بعد ردِعمل دیتے ہوئے کہا ہے کہ وہ ہیڈلائنز سے دور اپنے کام میں مصروف ہیں۔

حال ہی میں ایک پوڈکاسٹ میں صبا قمر نے کہا تھا کہ انہیں کراچی پسند نہیں، وہ وہاں صرف کام کے سلسلے میں جاتی ہیں اور پھر واپس اسلام آباد آجاتی ہیں۔ میزبان کے مستقل طور پر کراچی منتقل ہونے کے سوال پر اداکارہ نے “استغفراللہ” کہہ کر انکار کیا تھا۔

ان کے اس بیان پر سوشل میڈیا پر خاصی تنقید ہوئی، صارفین نے کہا کہ صبا قمر کراچی سے کماتی ہیں لیکن شہر کو ناپسند کرتی ہیں۔ اس کے جواب میں اداکارہ نے وضاحت دی کہ انہیں کھلی اور پرسکون جگہوں پر رہنا پسند ہے، جب کہ کراچی میں زیادہ تر اپارٹمنٹس ہیں — شاید یہی وجہ ہے کہ وہ شہر کو پسند نہیں کرتیں۔

صبا قمر کا یہ تبصرہ سوشل میڈیا پر تیزی سے وائرل ہوا، جس پر مشی خان اور دیگر فنکاروں نے بھی ردِعمل دیا۔

شدید تنقید کے بعد صبا قمر نے انسٹاگرام اسٹوری میں ایک مبہم پیغام شیئر کیا، جس میں اپنے بیان کا براہِ راست ذکر کیے بغیر کہا کہ ان کے پاس بریکنگ نیوز سے ہٹ کر اپنے جذبات اور رائے بھی ہیں۔

اداکارہ نے مزید لکھا کہ وہ “بریکنگ نیوز کی دوڑ سے الگ، اپنے کام کو مکمل کرنے میں مصروف ہیں۔”
انہوں نے اشارہ دیا کہ خبروں کے برعکس وہ اپنی معمول کی سرگرمیوں میں مصروف ہیں اور تنازعے سے زیادہ اہم ان کے لیے ان کا کام ہے۔