بی جے پی کا ہندوتوا ایجنڈا، بھارت میں اسلام دشمنی سر چڑھ کر بولنے لگی

بھارت میں حکمران جماعت بھارتی جنتا پارٹی (بی جے پی) کی جانب سے مسلم اقلیت کے خلاف امتیازی سلوک اور مسلم املاک کے انہدام کا سلسلہ مزید شدت اختیار کر گیا ہے۔ ہندو توا ایجنڈے کے تحت بھارتی انتظامیہ نے نئی دہلی کے علاقے شالیمار باغ میں واقع تاریخی مدینہ مسجد کو رات کی تاریکی میں منہدم کر دیا۔ معروف ترک نشریاتی ادارے ‘ٹی آر ٹی’ کے مطابق مقامی رہائشیوں نے انتظامیہ کے اس اقدام پر شدید احتجاج کرتے ہوئے تحفظات ظاہر کیے ہیں کہ مسجد کے اندر افراد کی موجودگی کے باوجود بلا تاخیر انہدامی کارروائی کی گئی۔

امریکی نشریاتی ادارے ‘مسلم نیٹ ورک ٹی وی’ کی تحقیقاتی رپورٹ میں انکشاف کیا گیا ہے کہ بھارت میں گزشتہ 6 سالہ بلڈوزر مہم کے دوران 2,100 سے زائد مسلم عبادت گاہوں، مدارس اور نجی عمارتوں کو غیر قانونی طور پر نشانہ بنا کر مسمار کیا جا چکا ہے۔ رپورٹ کے مطابق صرف 2020ء کے دہلی فسادات کے دوران بھی کم از کم 17 مساجد، مدارس اور مزارات پر ہندو انتہا پسندوں کی جانب سے حملے کیے گئے اور انہیں نذرِ آتش کیا گیا۔ عالمی انسانی حقوق کی تنظیموں نے بھارت میں مسلسل بڑھتی ہوئی اسلام دشمنی اور مسلمانوں کی بنیادی آزادیوں پر حملوں پر گہری تشویش کا اظہار کیا ہے۔