امیتابھ بچن کی شاہ رخ خان کی مشکلات کا سامنا کرنے، آگے بڑھنے کی تعریف

بالی ووڈ کے لیجنڈری اداکار امیتابھ بچن نے شاہ رخ خان کی مشکلات کا مردانہ وار سامنا کرنے، ان پر قابو پانے اور مسلسل آگے بڑھنے کے جذبے کی بے حد تعریف کی ہے۔ سپر اسٹار امیتابھ بچن اور اداکار راج کمار راؤ کے درمیان یہ گفتگو مقبول گیم شو ‘کون بنے گا کروڑ پتی’ (KBC) کے سیزن 18 کی تازہ ترین قسط میں ہوئی۔ شو کے دوران راج کمار راؤ نے دہلی سے ممبئی تک کے اپنے شوبز کے سفر اور ابتدائی دنوں کی یادیں شیئر کرتے ہوئے بتایا کہ وہ کیسے شاہ رخ خان کی جدوجہد سے متاثر ہو کر ان کے گھر ‘منت’ کے باہر گھنٹوں کھڑے رہا کرتے تھے۔

راج کمار راؤ کی گفتگو کا جواب دیتے ہوئے امیتابھ بچن نے شاہ رخ خان کے ساتھ کام کرنے کے اپنے تجربات کا تذکرہ کیا۔ انہوں نے کہا کہ شاہ رخ خان کی سب سے نمایاں خوبی یہ ہے کہ وہ کسی بھی مشکل صورتِ حال میں آسانی سے ہمت نہیں ہارتے اور ہمیشہ آگے بڑھتے رہتے ہیں۔ بچن کا کہنا تھا کہ شاہ رخ نہ صرف خود مشکلات کا سامنا کرتے ہیں بلکہ اپنے آس پاس موجود لوگوں اور فنکاروں کا حوصلہ بھی بڑھاتے ہیں اور ان کا اعتماد بحال کرنے میں اہم کردار ادا کرتے ہیں۔ یوں کے بی سی کے منچ پر شروع ہونے والی یہ گفتگو شاہ رخ خان کی فنکارانہ صلاحیتوں اور شخصیت کے خوبصورت پہلوؤں کو اجاگر کر گئی۔