اسلام آباد میں احتجاج کے تماشے کو ہمیشہ کیلئے بند کرنے کا فیصلہ کرلیا: رانا ثنا

وزیراعظم کے مشیر برائے سیاسی امور اور پاکستان مسلم لیگ (ن) کے سینئر رہنما رانا ثنا اللہ نے اعلان کیا ہے کہ وفاقی حکومت نے اسلام آباد میں احتجاج کے روز روز کے تماشے کو ہمیشہ کے لیے بند کرنے کا حتمی اور پالیسی فیصلہ کر لیا ہے۔ میڈیا سے گفتگو کرتے ہوئے رانا ثنا اللہ نے واضح کیا کہ اب کسی کو بھی پرتشدد احتجاج یا دھرنے کی غرض سے وفاقی دارالحکومت میں داخل ہونے کی اجازت نہیں دی جائے گی۔ انہوں نے پاکستان تحریک انصاف (پی ٹی آئی) کو متنبہ کیا کہ اگر اسلام آباد مارچ کے دوران طاقت یا شرپسنذی کا مظاہرہ کیا گیا تو 9 مئی کے واقعات کے بعد ملنے والی تمام تر رعایتیں اور سہولیات فوری طور پر واپس لے لی جائیں گی۔

دوسری جانب، وفاقی وزیر اطلاعات و نشریات عطا اللہ تارڑ نے پی ٹی آئی کی جانب سے لانگ مارچ کے التوا پر شدید ردعمل دیتے ہوئے کہا کہ پی ٹی آئی والے بزدل ہیں جو بار بار احتجاج اور دھرنوں کی کالز دے کر خود ہی فرار ہو جاتے ہیں۔ انہوں نے اپوزیشن کو چیلنج کرتے ہوئے کہا کہ اگر ان میں ہمت ہے تو اسلام آباد آ کر دکھائیں۔ عطا تارڑ نے مزید سنگین الزامات عائد کرتے ہوئے کہا کہ کے پی حکومت کالعدم ٹی ٹی پی اور افغان طالبان کی سہولت کاری کر رہی ہے، اور وزیراعلیٰ سہیل آفریدی سیاسی رہنما کے بجائے کالعدم تنظیم کے کمانڈر کا روپ دھارے ہوئے ہیں۔ ان کا کہنا تھا کہ کے پی میں غیر قانونی مائننگ کے ذریعے دہشت گردوں کی مالی معاونت کی جا رہی ہے جس پر سخت یکسوئی سے کارروائی ہوگی۔